Catro cousas hai no mundo
que resolven o sentido
amar e non ser amado
querer e non ser querido

Moreniña por morena
ténoche o ollo botado
has de ser miña muller
ou non hei de ter casado

A cinta de namorare
a cinta namoradeira
a cinta de namorare
tráiocha na faltriqueira

Como bandadas de pombas
voan os meus pensamentos
todos levan un camiño
o camiño do teu peito

A lúa vai encuberta
a min pouco se me dá
a lúa qu’a min m’aluma
dentro do teu peito está